ГБУЗ РТ «Противотуберкулезный диспансер»

Туберкулез аарыының үезинде дезинфекция – аарыгны болдурбазының эң-не кол чадазы. Бажыңга туберкулез дезинфекциязын бодунуң күжү-биле азы тускайжыттынган органзацияларны хаара тудуп чорудар.

Туберкулез – чурттакчы чон аразында калбаа-биле нептереңгей халдавырлыг аарыг. Россияда, өске сайзыраңгай чурттарга бодаарга, аарыг улустуң кезээ чижек-биле 10 хуудан хөй.

Аарыгның өөскүдүкчүзү Кох палочказы азы Micobacterium tuberculosis comрlex. Аарыгга алзыычал болгаш аарыычал улуска бичии уруглар болгаш иммунитеди кошкаш улус хамааржыр.

Аарыгның кол халдаар хевирлери:

-         агаар-дамды;

-         арыг эвес аяк-сава азы херекселдер таварыштыр (чемненгенде);

-         аваның уруг сыртыы азы божудулга үезинде.

Чугула! Туберкулез бациллазы даштыкы хүрээлелге турумчуун болгаш бодунуң “күжүн” үр үеде артар. Ынчангаш оран-сава иштин дезинфекциялаары аарыгны болдурбазының эң-не кол кезээ болур.

Сөөлгү үеде бактерияларның хөй-ле дезинфекция чүүлдерин шиңгээдип албазы демдеглеттинип турар. Аштап-арыглаарының чүүлдериниң шилилгезин тускай албан азы эмчиниң хыналдазы-биле чоруттунар ужурлуг.

Аарыгның кол халдавырлыг дөзү – долгандыр турар хүрээлелче аарыг кижиниң бациллаларының тарап үнүп турары болур.

Дезинфекцияның хевирлери.

Дезинфекция дээрге, халдавырлыг өөскүдүкчүнү узуткаарынче угланган хемчеглерниң каттышканы болур. Туберкулез үезинде бажың иштиниң дезинфекциязын колдуунда аштаар өрээлдиң хевиринден хамааржып, аңгы-аңгы хевирлерниң бөлүктериниң химиктиг чүүлдери-биле чорудар.

Дезинфекцияның угланыышкынга хамаарыштыр 2 хевир бар: амгы бо чорудар (текущая) база түңнел (заключительная).

Амгы бо чорудар дезинфекцияны аарыгның дөзү болур аарыг кижиниң бажыңындан дашкаар нептереп таравазын болдурбас сорулгалыг чорудар. Шак ынчаар аштап-арыглаар ажылды аарыг кижиниң чыдар орунунуң чанынга хүннүң-не кылыр.

Түңнел дезинфекция үезинде аарыг кижиниң харылзаалыг турган шупту херекселдерин аштап-арыглаар. Дүрүм езугаар шак ындыг дезинфекцияны чүгле айыттынган хемчеглерни чорудар дугайында чөпшээрелдиг тускай албан черлери чорудар.

Кандыг-даа таварылгада амгы бо чорудар база түңнел дезинфекциялар, аарыг кижиниң диспансер учедунда турар эмнелге чериниң хыналдазы-биле чоруттунар.